அடிதடி – குற்றம் – வலைப்பதிவர் சந்திப்பில் நடந்தது என்ன?

வலைப்பதிவர் சந்திப்பு - சில துளிகள்!

• எந்த வலைப்பதிவர் சந்திப்புக்கும் இல்லாத வகையில் ஏப். 22, 2007 அன்று நடந்த வலைப்பதிவர் சந்திப்புக்கு எதிர்பார்ப்பு ஏகத்துக்கும் எகிறி இருந்தது. ஸ்டார் பதிவர்களின் தாயக வருகையும் இதற்கு முக்கிய காரணம். வலைப்பதிவர் சந்திப்பு நடப்பதற்கு ஒரு வார காலம் முன்பாகவே சந்திப்புக்கு வரும்படி கூறி எஸ்.எம்.எஸ். மூலமாக சென்னை பதிவர்களுக்கு தொடர்ந்து ஒரு குழு தொல்லை கொடுத்துக் கொண்டிருந்தது.

• சந்திப்பு 3.30 மணிக்கு என்று தெளிவாகக் கூறியிருந்தும் அ.மு.க.வினர் அதிகாலையிலேயே சென்னையை முற்றுகை இட ஆரம்பித்தனர். 12.30 மணியளவில் அ.மு.க.வினர் ஒரு குழுவாகச் சென்று அரசப்பர் ஹோட்டலில் வான்கோழி மற்றும் முயல் பிரியாணிகளை ஒரு கட்டு கட்டினர்.

• கிராமங்களில் கல்யாணத்துக்கு முந்தின நாளே வெளியூரில் இருந்து மச்சான் வருவார். நைட் புல் மப்பில் மங்காத்தா ஆடி கொண்டுவந்த பணத்தையெல்லாம் கோட்டைவிட்டு, அதிகாலையிலேயே முகூர்த்தத்துக்கு முன்பாக ஊருக்கு கிளம்பிவிடுவார். நண்பர் செந்தழலாரும் அதே கேட்டகிரி. வலைப்பதிவர் சந்திப்புக்காக பெங்களூரில் இருந்து வந்தவர், அமுக சந்திப்பில் மட்டும் கலந்துகொண்டு 2 மணிக்கே ஊருக்கு மூட்டையை கட்டினார்.

• வலைப்பதிவர் சந்திப்புக்கு போலிஸ் வரக்கூடும் என்று யாரோ ஒரு புண்ணியவான் திரியைக் கொளுத்தி போட்டு விட்டு போய்விட்டார் போலிருக்கிறது. சில பதிவர்கள் வீட்டை விட்டு அன்று தலையை வெளியே காட்டவில்லையாம்.

• 3.30 மணிக்கு மொட்டை அணிந்த பிரபல வலைப்பதிவாளர் ஒருவருடன் நடேசன் பார்க்குக்கு சென்றேன். கில்லி பிரகாஷ், பாஸ்டன் பாலா, விக்கி போன்றோர் அதற்கு முன்பாகவே அங்கு வந்திருந்தார்கள்.

• பாஸ்டன் பாலா பார்ப்பதற்கு பட்டுக்கோட்டை பிரபாகர் போன்ற உருவ அமைப்புடன் இருப்பார் என்று கற்பனை செய்து வைத்திருந்தேன். அதுபோல இல்லாமல் கிரேஸி மோகன் நாடகங்களில் வரும் ஹீரோ மாது பாலாஜி போலிருந்தார்.

• சிறிது நேரத்தில் சிறில் அலெக்ஸும், உண்மைத் தமிழனும் வந்தனர். சிறில் அலெக்ஸின் பதிவில் போடப்பட்டிருக்கும் புகைப்படம் 30 ஆண்டுக்கு முன்பு எடுக்கப்பட்டதாக இருக்கலாம் என்று தோன்றியது.

• இட்லி வடை சந்திப்புக்கு வருவதாக எனக்கு ஜிமெயிலில் வாக்கு கொடுத்திருந்தார். இட்லி வடை என்ற பெயரை சொல்லிக்கொண்டு யாரும் வரவில்லை. நண்பர் கிருபாஷங்கர் வந்ததையே இட்லிவடை வந்ததாக கருதி திருப்தியடைந்தேன்.

• வலைப்பூ வைத்திருப்பவர் மட்டுமல்லாமல் வலைப்பூ வாசகர்கள் சிலரும் சந்திப்புக்கு வந்திருந்தார்கள். கருத்துக்களங்களில் பதிவு எழுதிவரும் பாரி போன்ற தோழர்கள் ஆர்வத்துடன் கலந்துகொண்டனர்.

• நண்பர் மோகன்தாஸ் பெங்களூரில் இருந்து வந்திருந்தார். அவரது உடையலங்காரமும், சிகையலங்காரமும் அனைவரையும் கவர்ந்திருந்தது. தலைக்கு அவர் அனூப் ஹேர் ஆயில் பயன்படுத்துவது அவரது எதிர்காலத்துக்கு நல்லது.

• சிறப்பு பார்வையாளராக குமுதம் இதழில் கார்ட்டூன் வரையும் பாலா என்ற ஓவியர் வந்திருந்து அமைதியாக நிகழ்ச்சியை கவனித்துக் கொண்டிருந்தார். தேர்தல் நேரத்தில் அவர் வரைந்த “பாசக்கிளிகள்” கார்ட்டூன் எனது ஆல் டைம் பேவரைட்.

• சுமார் 50 வலைப்பதிவர்கள் சந்தித்த முதல் தமிழ் வலைப்பதிவாளர் சந்திப்பு இதுவாகத்தான் இருக்கும் என்று நினைக்கிறேன். நினைத்ததை விட பிரம்மாண்டமாக சந்திப்பினை நடத்தினார்கள் சென்னைப்பட்டினம் நண்பர்கள்.

• விழா தொடங்கியதுமே சாகரன் அலை என்ற நினைவஞ்சலி மலர் வெளியிடப்பட்டது. புன்னகை மன்னன் மா.சிவக்குமார் வெளியிட சாகரனின் உயிர்த்தோழரான பாலராஜன்கீதா பெற்றுக் கொண்டார். இதழை கையில் வாங்கும் போது பாலராஜன்கீதா முகத்தில் தெரிந்த உணர்ச்சிகளை வார்த்தைகளில் விவரிக்க இயலாது.

• தருமி கருப்புநிற தேநீர்ச்சட்டையில் பக்கா இளைஞராக காட்சியளித்தார். சிகைக்கு மட்டும் ஹேர் டை அடித்தால் மதுரை ரோமியோக்களுக்கு கடும் அச்சுறுத்தலாக இருப்பார். ஏற்கனவே ஓகை நடராசன் டை அடித்து சென்னை இளைஞர்களின் வயிற்றை கலக்கிக் கொண்டிருக்கிறார்.

• நாகர்கோவிலில் இருந்து வந்திருந்த உங்கள் நண்பன் “எங்கே டி.பி.ஆர். சார்?” என்று கேட்டுக் கொண்டிருந்தார். “திரும்பிப் பார்த்து” அவர் வரவில்லை என்றேன்.

• பெட்டகம் பற்றி சிறிலும், ஸ்னாப் ஜட்ஜ் பற்றி பாஸ்டன் பாலாவும், மற்ற எது எதையோ பற்றி யார் யாரோ மொக்கை போட்டுக் கொண்டிருந்தார்கள்.

• கூட்டத்தில் கலந்துகொண்ட ஒரே பெண்பதிவர் தோழி பொன்ஸ் மட்டுமே. சமநீதி பேசும் பெண்பதிவர்கள் சந்திப்பிலும் கலந்துகொண்டு பெண்ணுரிமையை எதிர்காலத்திலாவது வலியுறுத்த வேண்டும். வெறும் எழுத்தும், பேச்சும் வேலைக்காகுமா? Action wins always.

• சந்திப்பு நடந்துகொண்டிருந்த போதே வளைகுடாவில் இருந்து அபி அப்பாவும், அவுஸ்திரேலிய அமுகவினரும் தொலைபேசி பல பதிவர்களுடன் பேசினார்கள்.

• தட்டை, முறுக்கு போன்ற பண்டங்கள் வினியோகிக்கப்பட்டன. என்ன இருந்தாலும் போண்டா மாதிரி வருமா என்று ஆதங்கப்பட்டுக் கொண்டே ஒரு பதிவர் முறுக்கினை நொறுக்கினார்.

• தமிழ்மண பின்னூட்ட உயரெல்லையை சிலர் ஆதரித்துப் பேசியபோது அது கருத்துச் சுதந்திரத்திற்கு விடுக்கப்பட்ட அச்சுறுத்தல் என்று ஓசை செல்லா பொங்கியெழுந்தார். நானும் அமுக சார்பில் என் எதிர்ப்பினை பதிவு செய்து கொண்டேன்.

• வலைப்பதிவர் சந்திப்பு நடந்த இடத்துக்கு அருகில் சுமார் 20 பேர் சேர்ந்து ஏதோ சந்திப்பு நடத்திக் கொண்டிருந்தார்கள். அவர்களில் ஒருவர் பொன்மாலைப் பொழுது பாடலை அருமையாகப் பாடினார். பிளேடு போடப்பட்டு கழுத்தறுக்கப்பட்ட நிலையில் இருந்தவர்களுக்கு அப்பாடல் தேவாமிர்தமாக இருந்தது.

• சந்திப்பு நடந்துக் கொண்டிருந்தபோதே ரோசாவசந்த், பாஸ்டன் பாலா, கில்லி போன்றோர் செம இலக்கிய தாகத்துடன் வெளிநடப்பு செய்தனர். அடுத்த முறை சந்திப்பினை நடத்துபவர்கள் “தண்ணி பாட்டிலும் Allowed” என்ற சலுகையை காட்டவேண்டும். தாகம் தணிந்து கூட்டம் முடியும் தருவாயில் ஸ்டெடியாக இக்குழுவினர் மீண்டும் வந்தனர்.

• குறும்புக்கார வலைப்பதிவர் ஒருவர் அட்டெண்டன்ஸ் ரெஜிஸ்டரில் தன்னுடைய வலைப்பூ முகவரியாக doondu.blogspot.comஐ எழுதியிருந்தார்.

• வினையூக்கி வழக்கம்போல தான் எழுதும் கதை, கட்டுரைகளை ஒரு “அனானி” கன்னாபின்னாவென்று விமர்சிப்பதாக வருத்தப்பட்டார். அவர் அதை குறிப்பாக என்னிடம் ஏன் தான் சொன்னாரோ என்று தலையைப் பிய்த்துக் கொண்டிருக்கிறேன்.

• ஈழப்பதிவர்கள் யாரும் கலந்துகொள்ளாதது எனக்கு ஏமாற்றம் அளித்தது.

• பதிவர் ஒருவருக்கு சந்திப்பு நடந்த தினம் திருமணநாளாம். மனைவியிடம் அலுவலகத்துக்கு போகிறேன் என்று பொய்சொல்லிவிட்டு சந்திப்பில் கலந்து கொண்டாராம். அவரது தொலைபேசி சிணுங்கிய போதெல்லாம் பேயறைந்தது போல சம்பந்தப்பட்ட பதிவரின் முகம் திகிலடைந்தது பரிதாபமாக இருந்தது.

• கூட்டம் ஆரம்பித்து ஐந்து நிமிடங்கள் ஆகியிருக்கும். சுமார் 50 மீட்டர் தொலைவில் இருவர் மிகக்கடுமையாக ஒருவரை ஒருவர் தாக்கிக் கொண்டனர். அவர்களில் ஒருவர் நீலக்கலர் லுங்கி அணிந்து தியாகராஜ பாகவதர் ஹேர் ஸ்டைலில் இருந்தார். மற்றோருவர் ஷார்ட்ஸ் அணிந்து தொந்தியும், தொப்பையுமாக கேவலமாக காட்சியளித்தார். அவர்கள் அமுக, போட்டி அமுக அமைப்பைச் சேர்ந்தவர்களாக இருக்கக்கூடும் என்று நாமக்கல்லில் இருந்து வந்திருந்த துப்பறியும் சாம்பு தெரிவித்தார்.

• இலைக்காரன் நான் கிடையாது. அது லக்கியும் அல்ல என்று திட்டவட்டமாக ஸ்டேட்மெண்டு விடுத்திருந்தார் முத்து (தமிழினி)

• “போலி” என்றச் சொல்லை எந்த வலைப்பதிவரும் உபயோகிக்காமல் நடந்த தமிழின் முதல் வலைப்பதிவர் சந்திப்பு இது என்பது குறிப்பிடத்தக்கது. “சல்மா” என்று ஆரம்பித்தவர்களின் வாயில் உடனடியாக “தூயா”-வின் செய்முறைக் குறிப்புகளோடு செய்யப்பட்ட அல்வா திணிக்கப்பட்டது. சந்திப்பு முடியும் வரையிலும் அல்வா அடைக்கப்பட்டவர்களால் வாயைத் திறக்கமுடியவில்லை.

• குங்குமம் பத்திரிகையைச் சார்ந்த பெண்பத்திரிகையாளர் ஒருவர் கேமிராமேனுடன் வந்திருந்து நிகழ்ச்சியை கவர் செய்தார்.

• மக்கள் தொலைக்காட்சியின் குழு ஒன்று கேமிராவுடன் வந்திருந்து பரபரப்பை ஏற்படுத்தினர். பேட்டி, கவரேஜ் என்று அசத்தினர். மக்கள் தொலைக்காட்சியின் செய்தி மற்றும் விளம்பரப் பிரிவுத் தலைவரும் நேரில் வந்திருந்து தமிழ் இணையத்துக்கு மக்கள் தொலைக்காட்சியில் தகுந்த இடம் அளிக்கப் போவதாக கைத்தட்டல்களுக்கு இடையே தெரிவித்தார்.

• இன்று காலை (23-4-07) மக்கள் தொலைக்காட்சி செய்திகளில் வலைப்பதிவர் சந்திப்பு விரிவாக காட்டப்பட்டது. சிறில் அலெக்ஸ் மற்றும் பாலபாரதி ஆகியோரின் Bite இடம்பெற்றது. க்ரூப் ஷாட்டில் மொட்டைத் தலை பதிவர் ஒருவரும், கருப்பு-சிவப்பு உடையலங்காரத்தில் இருந்த பதிவர் ஒருவரும் “பளிச்” எனத் தெரிந்தார்கள்.

• “பெண்ணே நீ” என்ற மாத(ர்) பத்திரிகை சந்திப்புக்கு வந்திருந்தவர்களுக்கு வினியோகிக்கப்பட்டது. நம் வலைப்பூ நண்பர் ஒருவரின் ஆர்ட்டிக்கிளும் அந்த இதழில் இடம்பெற்றிருப்பது குறிப்பிடத்தக்கது.

• சந்திப்பு முடிந்ததும் வழக்கம் போல ஒரு க்ரூப் “தாகத்துடன்” தி.நகர் பஸ் ஸ்டேண்டுக்கு கிளம்பியது. அச்சந்திப்பில் ஓகை நடராசன், ஓசை செல்லா, தருமி, வரவனையான், சிறில் அலெக்ஸ், உங்கள் நண்பன், நாமக்கல்லார், ரோசா வசந்த் போன்ற பக்திமான்கள் கலந்துகொண்டு பூசை செய்ததாகத் தெரிகிறது. புளியமரமும், லக்கிலுக்கும் பார்வையாளர்களாக சென்று கவுரவித்து செவன்-அப் பருகியதாகவும் இரவுக்கழுகார் வட்டாரங்கள் தெரிவிக்கின்றன.

• ஓசை செல்லாவுக்கும், சுகுணா திவாகருக்கும் இடையில் மாட்டிக் கொண்டு ஓகையார் அவஸ்தைப் பட்டாராம். அங்கே பார்ப்பனீயம், புரட்சி, சமுதாய மறுமலர்ச்சி போன்ற விஷயங்கள் அக்குவேறு, ஆணிவேறாக அலசப்பட்டதாம்.